Komuna e Obiliqit zgjat orarin e punës për shkak të diasporës – shërbimet do të jenë pa pauzë deri më 31 gusht

Për shkak të ardhjes së bashkatdhetarëve gjatë sezonit të verës, Komuna e Obiliqit ka vendosur të zgjerojë orarin e punës në disa nga shërbimet më të kërkuara komunale.

Drejtoresha e Administratës së Përgjithshme, Linda Bekteshi, ka njoftuar se nga dita e nesërme deri më 31 gusht, njësitë komunale si Qendra për Shërbim me Qytetarë, Gjendja Civile, Zyra e Tatimit në Pronë dhe sportelet e Kadastrit do të punojnë pa ndërprerje gjatë ditës, pra pa pauzë.

“Zgjatja e orarit është bërë për shkak të rritjes së fluksit me ardhjen e diasporës. Ne mbesim të përkushtuar të ofrojmë shërbime sa më cilësore për të gjithë qytetarët. Mirë se vini, bashkatdhetarë!”, ka shkruar Bekteshi në profilin e saj zyrtar në Facebook, ku ka bashkëngjitur edhe vendimin e marrë.

Ky vendim synon të lehtësojë procedurat administrative për bashkatdhetarët, të cilët gjatë qëndrimit në vendlindje zakonisht përballen me kohë të kufizuar për të kryer shërbime publike.